19 Nisan 2018 Perşembe

DÎYET: Di Heftekê de Min 1.5 Kîlo Heland

Dermanxane
dê haa
Dema min dest bi dîyeta xwe ya delal kiribû, Nanoziko ji min re gotibû ku ''Bo moral û motîvasyonê lazim e heftê carê, serê sibê bi zikê birçî herî ser mêzînê''

Îro Pêncşemê dîyeta min hefteyek li dû xwe hişt. Loma, serê sibê mîna mêrekî sûcdar î ber bi sêdarê gavan diavêje, hinekî bi tirs hinekî bi heyecan ber bi dermanxaneyê meşîyam.

Li gor ponijîna li ser rê, eger min kîlo daxista ji xwe min dikira xwe ji enîya xwe ramûsa, eger min danexista jî min dikira guneh di stûyê tepsîya patatesan ya şeva berê kira.

Xêr û guneh li stûyê min ketim dermanxaneyê û li dû silavê dîrekt çûm mêzîna li quncik. Kêlîyên ku reqemên mêzînê têde vîzzzzzzz çerx dibin û tên li cîhekî disekinin û vedimirin û vêdikievin.. Eger nivîskarek xwe bide ber, dikare bi rihetî li ser romaneke ku ''ku'' têde pir derbaz dibe binivîse û pê Xelata Wejêyê ya Ehmedê Xanî bistîne. Yan şairek, dikare navê dosyeya xwe ya şiîran bike ''Kîlo û Kêlî'' û wê ji Pêşbirka Helbesta ya Arjen Arî re bişîne: Di hefteyekê de ji 96.75'an daketim 95.30'î, di berîka min de pereyên hesinî!

Arjîn dîyar dike ku li gor dîyeta îdeal, meriv di hefteyekê de 1-1.5 kîlo kêm dike. 400 gram zêde 400 gram kêm, di mehekê de lazim e meriv 5 kîloyan bide. Li gor gotina wê û Nanoziko, min performanseke payabilind raber kiriye û çepik û emojîyên din yên heyranîyê heq kirine. Kêfxweş im.

Eger hûn jî dixwazin di hefteyekê de bi kêmî ve kîloyekê ji xwe kêm bikin, bi van sê qaîdeyan hereket bikin: Yek, şêranîyê mexwin, dudu, nên daxin ribê riban, sisê, her ro herî kêm sê lître av vexwin..

Ha eger dilê we terka şêranîyê raneke û hûn pir li ber dikevin, ji min re formul û ji we re torpîl: Ji cem etaran çoçikên darçînê bistînin û bera şûşeyên xwe yên avê din û bêrîkirina şêranîyê bi rihetî bişkînin. 

18 Nisan 2018 Çarşamba

Bo Kübra Sağır Mektûbek

Loqima Efrînê
binivîs û bişîne 
Merheba xwendevanên Perxudresê!

Ez dibêm qey li welêt ti Kurdên ku bi xwe yan û nas û dostên wan neketine hepsê nemane.

Loma ezê dûr û dirêj behsa kêfxweşîya ku tek mektûbeke tenê dide hepsîyekî/ê nekim.

Kübra Sağır, ku li Zanîngeha Boğaziçiyê xwendekar e, jiber protestokirina ''loqima Efrînê'' tevî hin hevalên xwe kete hepsê; ji nêv wan yekane Kurd, Kübra ye.

Ti hevaltîya min û Kübra tine, lê tenê nivîsên wê yên bo kovarên Kurmancî kiriye ku di navbera me de peywendîya nivîskar-xwendekar çêbibe.

Loma ez dikim jê re nameyekê binivîsim û hewil bidim wê hinekî bikenînim.

Bi heqê blogerîyê, ez bi rica bang li hemî blogerên me yên Kurmanc û xwendevanên wan dikim ku hema sê çar hevok bin jî ji Kübra re mektûbekê bişînin.

Spas.

NOT: Rewşa Tirkîyê jixwe hûn dizanin, mektûbên bi Kurdî nayên qebûl kirin. Ji kerema xwe mektûbê bi Tirkî binivîsin.

Adres: Bakırköy Kadın Kapalı Cezaevi, Zuhuratbaba Mah. Dr. Tevfik Sağlam Caddesi, Lepra Hastanesi Yanı No: 28 B6 Koğuşu Bakırköy / ISTANBUL


17 Nisan 2018 Salı

Dîwaneke Bêferheng: Xewdizê

Soran Amed
nexşanî
Xewdizê: Ji nêv peyvên Kurmancî şêrîna ber dilê min ''xemrevîn'' bû bi salan, hewi bi ser de hat.

Berbad: Redaksîyona Weşanxaneya Dara, navê êdîtor li rûpela pêşî Kasimê Xelîlî ye, lê li pêşgotinê Qasimê Xelîlî; mînak.

Soran Amed: Di Sibata 2018'an de berhema xwe ya pêşî di navbera gund û bajarên di navbera Klasîk û Modernê de anîye rûye dinê, bi navê Îlyas Kaya jî tê nasîn.

Berken Bereh: Pêşgotina helbesta bi Kurmancî, bo ''Xewdizê'' dibêje ''vê dinyaya derewîn bi her alîyên wê ve li ber dilê me şîrîn û xweş dike'' û çavan ji paşgotinê re diqirpîne.

J. D: Bi gumanên gur Jan Dost e, ger ew be kurtkirina nêv mesele ye, meseleya jê mezintir jî, wî di pêşgotina ''Xewdizê'' de, ''Xwedizê'' nivîsîye, nizam xwe ji kê didize.


16 Nisan 2018 Pazartesi

Dermanê Darçînî û Benîştê Mêran

First Sensations
av, çoçik û benîşt
Dîyeta min di roja pêncan de didome. Rast yan derewa hest û hestîyên min, ez xwe hinekî sivik hîs dikim.

Êdî li def û dawetan, gava çayê belav dikin kevçîyê çayê bi kubarî li ser tepsîyê datînim û şêkir red dikim. Niha li mal kunefe jî heye, lê ez nakevim hepsa nefsa xwe, çinku min çareserîyeke çak î pak dîtiye: Darçîn!

15 Nisan 2018 Pazar

Li Pişt Dîwarên Derve

Riha - Nîsan 2018
Hêza lêv dida ser lêvan ji hemî Xwedayan mezintir bû, ''guherîn'' û ''ve-guherîn'' ji hevdu cihê bûn, çito ku ''kirin'' û ''ve-kirin'' ne eynî tişt bûn, wisa. 
Related Posts with Thumbnails